Apple qo‘sh ekranli iPhone chiqaradi: u haqda nimalar ma’lum

Taniqli tahlilchi Min-Chi Kuo fikricha, Apple kelasi yili o‘zining birinchi buklanadigan smartfonini chiqarishi kerak. Kupertino bunday gadjetlar bozoriga kirish uchun jiddiy tayyorgarlik ko‘rmoqda.

Unga ko‘ra, yig‘ma qismlarni yetkazib beruvchi Foxconn zavodi sentabr-oktyabr oylarida buklanadigan iPhone loyihasini rasman ishga tushiradi. Aksariyat komponentlar hali ishlab chiqilayotgan bo‘lsada, Kuo bozor ishtirokchilari uchun alohida qiziqish uyg‘otadigan buklanadigan displey allaqachon tasdiqlanganini ta’kidlaydi.

Smartfon 2026 yil yozida ommaviy ishlab chiqarilishi kutilmoqda, taqdimoti esa o‘sha yil kuzida bo‘lib o‘tadi. Apple buklanadigan qurilmani iPhone 18 seriyasining bir qismi sifatida e’lon qilmoqchi.

Hozircha ushbu iPhone haqida rasmiy ma’lumotlar yo‘q - faqat insayder ma’lumotlari. Smartfon egiluvchan 7,8 dyuymli OLED-displeyga ega bo‘lishi kutilmoqda. Ya’ni, o‘lchami bo‘yicha u deyarli planshet displeyining hajmiga yetadi. Tashqi ekran buklanganda diagonali 5,5 dyuymga teng bo‘ladi.

Avvalroq Mark Gurman iPhone Fold ikkita asosiy xususiyatga ega bo‘lishini ma’lum qilgandi. Birinchisi, ochilganda deyarli sezilmaydigan burma. Ikkinchisi - barcha raqobatchilarga qaraganda ancha yuqori sifatli sharnir. Katta ehtimol bilan u titan va zanglamaydigan po‘latdan yasalgan bo‘ladi.

Oxirgi ma’lumotlarga ko‘ra, buklanadigan iPhone narxi 2000 dollardan 2500 dollargacha bo‘ladi. Chiqarilganidan keyingi birinchi yilda Apple yangi mahsulotga bo‘lgan qiziqishni 6 million donaga baholamoqda.

Apple aslida mahsulot assortimentida hali ham buklanadigan qurilmaga ega bo‘lmagan yagona texnologik gigant bo‘lib qolmoqda. Shu bilan birga, asosiy raqobatchi Samsung bu yil uchga buklanadigan birinchi telefonni chiqarishga tayyorgarlik ko‘rmoqda. Shuningdek, iPhone 16 narxidagi buklama smartfonni ham ishlab chiqarishga tayyorlanmoqda.