«Eronning hujumi zarurat tug‘ilgunicha davom etadi» - general Ahmad Vahidi

Eronning Islom inqilobi muhofizlari korpusi rahbarining harbiy maslahatchisi generali Ahmadi Vahidi Isroilga qarshi boshlangan «Haqiqiy va’da – 3» (Operation True Promise III) nomli javob hujumi zarurat tug‘ilguniga qadar davom etishini ma’lum qildi.

13 iyun kuni kechqurun Eron davlat telekanaliga bergan intervyusida brigada generali Ahmadi Vahidi ushbu operatsiya doirasida Eron tomonidan bosib olingan hududlarda joylashgan bir qator Isroil nishonlariga zarba berilganini bildirdi.

Uning so‘zlariga ko‘ra, Nevatim va Ovda harbiy aviabazalari – Isroilning qo‘mondonlik va boshqaruv markazi hamda elektron urush markazi joylashgan maskanlar nishonga olingan. Vahidi bu ikki baza Eronga nisbatan tajovuz manbai sifatida ishlatilganini ta’kidladi.

Shuningdek, IIMK tomonidan zarba berilgan boshqa nishonlar qatorida Tel-Aviv yaqinidagi Tel Nof aviabazasi, Isroilning mudofaa vazirligi, shuningdek, Tel-Avivdagi sanoat va harbiy markazlar bo‘lgani qayd etilgan.

Vahidining so‘zlariga ko‘ra, operatsiyani rejalashtiruvchilar jami 150 dan ortiq nishonni belgilab, ularga bir necha bosqichda zarba bergan.

«Isroil rejimi Eronni nishonga olish orqali og‘ir xatoga yo‘l qo‘ydi va tsionistlar bu harakatlar oqibatiga tayyor bo‘lishlari kerak», deya general Vahidining so‘zlarini keltirmoqda Mehr axborot agentligi.