Oq uy 36 davlat fuqarolarining AQShga kirishini taqiqlash masalasini ko‘rib chiqmoqda

Donald Tramp ma’muriyati fuqarolari AQShga kirishi to‘liq yoki qisman taqiqlangan davlatlar ro‘yxatini sezilarli darajada kengaytirish imkoniyatini ko‘rib chiqmoqda. Bu haqda 15 iyun, yakshanba kuni AQSh Davlat departamentining davlat kotibi Marko Rubio imzolagan ichki diplomatik telegramma matniga tayanib Reuters agentligi xabar berdi.

Telegrammada aytilishicha, agar 60 kun ichida Vashington xavotirlari sabablarini bartaraf qilmasa, 36 «tashvishga sabab bo‘luvchi» davlat cheklovlarga duchor bo‘lishi mumkin. Xususan, ayrim mamlakatlar fuqarolari AQShdagi terrorchilik harakatlarida yoki «antisemit va antiamerika harakatlarida» qatnashgan», deya ma’lum qildi AQSh Davlat departamenti.

Ro‘yxatdagi boshqa davlatlar AQSh ma’muriyati xohlaganidek o‘z fuqarolarini AQShdan chiqarib yuborishga yordam bermagan yoki «ishonchli shaxsni tasdiqlovchi hujjatlarni berish uchun vakolatli yoki hamkorlik qiluvchi hukumatga ega emas», deya ta’kidlagan idorav. Yana boshqa ba’zi davlatlar tomonidan berilgan pasportlar Vashington tomonidan «shubhali» deb baholanadi.

Fuqarolari ikki oydan so‘ng AQShga kirishi to‘liq yoki qisman taqiqlanishi mumkin bo‘lgan 36 ta davlat: Angola, Antigua va Barbuda, Benin, Burkina-Faso, Butan, Vanuatu, Gabon, Gambiya, Gana, Kongo Demokratik Respublikasi, Jibuti, Dominika, Misr, Zambiya, Zimbabve, Kabo-Verde, Kamboja, Kamerun, Kot-d'Ivuar, Qirg‘iziston, Liberiya, Mavritaniya, Malavi, Niger, Nigeriya, San-Tome va Prinsipi, Senegal, Sent-Kits va Nevis, Sent-Lyusiya, Siriya, Tanzaniya, Tonga, Tuvalu, Uganda, Efiopiya va Janubiy Sudan.