Tramp Rossiyaning G8 tashkilotidan chetlatilishini xato deb atadi

AQSh prezidenti Donald Tramp Rossiyani G8 formatidan chiqarish qarorini va tashkilotning keyinchalik G7 formatiga qaytishini xato deb atadi. Oq uy rahbari buni Kanada mezbonlik qiladigan G7 sammiti arafasida aytdi.

Amerika yetakchisi Rossiyaning «Katta Sakkizlikka» a’zo bo‘lishi Ukrainadagi mojaroning oldini olishi mumkin edi, degan fikrni takrorladi.

«Katta yettilik avvallari G8 edi. Barak Obama (AQSh sobiq prezidenti) va Tryudo (Kanada sobiq bosh vaziri) ismli kishi Rossiyani kiritishni istamadi. Buni xato deb aytgan bo‘lardim, chunki menimcha, agar Rossiya guruhda bo‘lganida hozir urush bo‘lmasdi va agar Tramp to‘rt yil oldin prezident bo‘lganida hozir urush bo‘lmasdi», dedi AQSh prezidenti.

Donald Tramp avval ham Rossiyaning «Katta Sakkizlik»dagi ishtiroki Ukrainada harbiy harakatlar boshlanishining oldini olishi mumkinligini aytgan edi. May oyida u Buyuk Britaniya, Germaniya, Italiya, Kanada, AQSh, Fransiya va Yaponiya ishtirokidagi ushbu formatdagi hamkorlik ko‘p foyda keltirishini ta’kidladi.

Rossiya 1997 yildan buyon 17 yil davomida xalqaro G8 klubining a’zosi bo‘lgan. Unga ikki marta raislik qilgan. 2006 yilda Sankt-Peterburgda G8 sammiti bo‘lib o‘tdi. 2014 yilda Sochida yetakchilarning uchrashuvi o‘tkazilishi rejalashtirilgan edi. Biroq mart oyida Qrimni bosib olgach, G‘arb davlatlari G8 formatidan Rossiyani chetlatdi va G7 formatiga qaytdi.