Qozog‘iston prezidenti Xitoyga 1,5 ming bosh sayg‘oq sovg‘a qildi

Qozog‘iston Xitoyga 1,5 ming bosh sayg‘oq sovg‘a qiladi. Bu haqda prezident Qosim-Jo‘mart To‘qayev ma’lum qildi, deb yozdi «Zakon».

«Qozog‘iston prezidenti Qosim-Jo‘mart To‘qayev qo‘shni davlatdagi populyatsiyasini tiklash maqsadida Xitoyning g‘arbiy qismiga qo‘yib yuborish uchun Xitoy hukumatiga 1,5 ming bosh sayg‘oqni sovg‘a qilish to‘g‘risida qaror qabul qildi. O‘z navbatida, Xitoy raisi Si Jinping sayg‘oqlar populyatsiyasini qayta tiklash bo‘yicha qabul qilingan qarori uchun Qosim-Jo‘mart To‘qayevga minnatdorchilik bildirdi», deyiladi xabarda.

Avvalroq Qozog‘istonda sayg‘oqlar populyatsiyasi haddan ziyod ko‘paygani, mahalliy fermerlar bundan aziyat chekayotgani haqida xabarlar tarqaldi. Bu yil sayg‘oqlar soni 5 milliondan oshishi kutilmoqda.

Sayg‘oqlar hatto Rossiya hududlariga ko‘chib o‘tib, ekinlar, yaylovlar, pichanzorlarni payhon qilayotgani tufayli, rossiyalik fermerlar prezident Vladimir Putindan yordam so‘ragan edi.