Qirg‘iziston poytaxtida blekaut yuz berdi

Qirg‘iziston Energetika vazirligi xabariga ko‘ra, 18 iyun kuni Bishkekka xizmat ko‘rsatuvchi yirik nimstansiyada avariya yuz berdi. Oqibatda shahar elektr ta’minotidan uzildi.

Kaktus.media xabariga ko‘ra, ko‘pgina hududlarda suv ta’minoti yo‘qoldi, chunki nasos stansiyalari ham elektr energiyasi bilan ishlaydi. Ba’zi uyali aloqa operatorlari aloqadan va internetdan foydalanish imkoniyatini chekladi.

Jogorku Kenesh (parlament) sessiyasi zulmatda o‘tkazildi. Deputatlar Adliya masalalari bo‘yicha kengash a’zolarini qorong‘uda sayladi.

Bishkek shahri IIB butun shaxsiy tarkibni, shu jumladan ikkinchi smenani oyoqqa turg‘azdi. Xodimlar shahardagi chorrahalarda harakatlanishni tartibga solish uchun yo‘naltirildi.

Bank ilovalari ishlamay qoldi, kassa apparatlari ishlamayotgani uchun do‘konlar faoliyati ham to‘xtadi.

Kechga yaqin elektr energiyasi ta’minoti tiklangani, mutaxassislar blekaut sabablarini o‘rganayotgani haqida xabar berildi.