Kiyevga harbiy yordam ishi: Slovakiyada 8 kishi qo‘lga olindi

Slovakiya politsiyasi sakkiz kishini, jumladan, mamlakat Mudofaa vazirligining to‘rt nafar xodimini Ukrainaga yordam mablag‘larini noto‘g‘ri ishlatish ehtimoli bo‘yicha qo‘lga oldi, deb xabar berdi Reuters 18 iyun, chorshanba kuni Slovakiya prokuraturasiga tayanib.

Ish Yevropa prokuraturasi tomonidan ochilgan. Bunga Ukrainada 2022 yilda urush boshlanganda Konstrukta davlat mudofaa kompaniyasidan 12 ming minomyot o‘q-dorilari sotib olingani sabab bo‘lgan. Prokuratura o‘q-dorilar oshirilgan narxda sotib olingan deb gumon qilmoqda. Mablag‘larni o‘zlashtirish miqdori 7,4 million yevroni tashkil qilishi mumkin, deb hisoblamoqda prokuratura.

Tergov doirasida politsiya Slovakiya sobiq mudofaa vaziri Yaroslav Nadni ham hibsga olishga uringan, biroq u uyda bo‘lmagan, deya xabar bermoqda Reuters agentligi Dennik N portaliga tayanib. Mamlakatning avvalgi hukumati tarkibida bo‘lgan mudofaa vazirligining sobiq rahbari bu shubhalarni «teatr», ishning o‘zini esa «siyosiy» deb atadi.

Nadning so‘zlariga ko‘ra, u Kanadada ta’tilda va oy oxirida qaytishi kutilmoqda. «Ukrainaga qanday yordam berganimizdan qanchalik faxrlanishimni qayta-qayta takrorlayman. Men buni yana qilgan bo‘lardim. Chunki bu insoniylik va mas’uliyat. Rossiya agressiyasining begunoh qurbonlarini himoya qilish. Ed Xeger hukumati esa buni yaxshi bilgan va to‘g‘ri ish qilgan», deb yozadi u.

Yaroslav Nad 2020 yildan 2023 yilgacha avvalgi hukumat davrida Slovakiya mudofaa vaziri lavozimida ishlagan. Saylovda g‘alaba qozongach, mamlakatning amaldagi bosh vaziri Robert Fitso Slovakiyadan Ukrainaga barcha harbiy yordamni to‘xtatdi.