Zelenskiy Rossiya, Eron va KXDRni «qotillar koalitsiyasi» deb atadi

«Ushbu zarba to‘rt hududdagi obektlarga zarar yetkazdi. Bu kechada jami 352 ta dron, jumladan, 159 tasi shahedlar, 16 ta raketa kuzatildi. Dastlabki ma’lumotlarga ko‘ra, Shimoliy Koreyadan olingan ballistika ham qo‘llangan», deb yozdi Ukraina prezidenti Volodimir Zelenskiy 23 iyun, dushanba kuni ertalab Telegramʼdagi sahifasida. U Rossiya, Eron va KXDRga qo‘shni bo‘lgan barcha davlatlar o‘z vatandoshlarining hayotini himoya qilish haqida o‘ylashi kerakligini ta’kidlab, ushbu davlatlarni «qotillar koalitsiyasi» deb atadi.

«Bugun Buyuk Britaniyaga tashrifim chog‘ida men hamkorlarim bilan aynan shu mavzuda — mudofaamiz haqida gaplashaman, u ancha kuchli qo‘shma mudofaa uchun asos bo‘lishi kerak. Shuningdek, biz Rossiyaga ushbu urush uchun bosim o‘tkazish va zarbalarni to‘xtatish bo‘yicha yangi va kuchli qadamlar haqida kelishib olamiz», — dedi Zelenskiy bayonotida.

Kiyev viloyatining Belotserkovskiy tumanida 23 iyunga o‘tar kechasi Rossiyaning Ukraina poytaxti va viloyatiga hujumi natijasida kamida bir kishi, 1957 yilda tug‘ilgan ayol halok bo‘ldi, dedi Kiyev viloyati harbiy ma’muriyati (KVHM) rahbari Nikolay Kalashnik. Bundan tashqari, Belotserkovskiy tumanida xususiy uylar va turar joy binosiga zarar yetgan, tibbiyot muassasasi joylashgan mehmonxona binosi vayron bo‘lgan.

Ukraina poytaxti meri Vitaliy Klichkoning ma’lum qilishicha, Kiyevga zarba oqibatida olti kishi halok bo‘lgan, 15 dan ortiq kishi jarohatlangan. O‘n kishi, jumladan, ikki bola va homilador ayol qutqarib qolindi. Ukraina ommaviy axborot vositalarining yozishicha, Rossiyaning Ukraina poytaxti va mamlakatning boshqa hududlariga uchuvchisiz uchoqlar, ballistik va qanotli raketalar yordamidagi hujumi deyarli tun bo‘yi davom etgan.

Kiyev shahar harbiy ma’muriyati (KShHM) ma’lumotlariga ko‘ra, «Svyatoshin» metro bekati infratuzilmasi shikastlangan, chiqishlardan biri vaqtincha yopilgan. Ushbu ma’lumotlarga ko‘ra, Darnitskiy tumanida ikki qavatli turar joy binosi zarar ko‘rgan. Desnyanskiy tumanidagi turar joy binosi hovlisida chuqur o‘ra paydo bo‘ldi. Ukraina poytaxtining Shevchenko tumanida besh qavatli binoning kirish qismi vayron bo‘ldi. Vayronalar ostida odamlar bo‘lishi mumkinligi taxmin qilinmoqda.

Rossiya qo‘shinlari 23 iyunga o‘tar kechasi Ukrainaga Shahed tipidagi hujumkor 352 ta uchuvchisiz uchoq va turli xil imitator dronlar, 11 ta «Iskander-M/KN-23» ballistik raketalari va 5 ta «Iskander-K» qanotli raketalari bilan hujum qildi», — deya xabar berdi Ukraina Havo kuchlari o‘zining Telegram-kanalida. Unga ko‘ra, uchirishlar Kursk, Shatalovo, Orel, Bryansk, Millerovo, Primorsk-Axtarsk va Taganrogdan amalga oshirilgan. «Hujumning asosiy yo‘nalishi Kiyev shahri edi!» - deya ta’kidlandi Ukraina qurolli kuchlarida.

Xabarga ko‘ra, Ukraina havo hujumidan mudofaa kuchlari 354 ta havo hujumi qurolini, jumladan 7 ta «Iskander-M» va 5 ta «Iskander-K» raketalarini urib tushirishga muvaffaq bo‘lgan. «Dushmanning havo hujumi bilan to‘g‘ridan to‘g‘ri zarbalar 6 ta joyda, shuningdek, Kiyev shahri va Kiyev viloyatidagi 25 ta joyda qayd etildi», — deyiladi ukrainalik himoyachilar bayonotida.