Dunyo yangiliklari, Дунё янгиликлари, Мировые новости, World news
Qo‘shma Shtatlar eronparast guruhlarning Iroq va ehtimol Suriyadagi bazalariga hujum qilishga tayyorlanayotgani alomatlarini aniqladi.
Foto: Getty images
AQSh harbiylari va razvedka xizmatlari Eron tomonidan qo‘llab-quvvatlanadigan guruhlar Qo‘shma Shtatlarning Iroq va ehtimol Suriyadagi bazalariga hujum qilishga tayyorlanayotgani alomatlarini aniqladi, deb yozdi 22 iyun kuni The New York Times (NYT).
Nashr manbasining xabar qilishicha, hozir bu guruhlar tiyib turilmoqda va Iroq rasmiylari ularni Amerika bazalariga hujum qilishdan qaytarish uchun «barcha choralarni ko‘rmoqda». NYT boshqa tafsilotlarni keltirmadi.
Shu bilan birga, Eronning Mehr va Fars axborot agentliklari Iroqning Al-Maalomah axborot agentligiga tayanib, Suriyaning Kasruk hududidagi Amerika harbiy bazasiga hujum uyushtirilgani haqida xabar berdi. Aytilishicha, baza minomyotdan o‘qqa tutilgan. Kim o‘q uzgani noma’lum. Hujum ortidan bazada xavfsizlik choralari kuchaytirilgan.
AQSh rasmiylari o‘z bazasiga qilingan hujum haqida xabar bermadi va Eron agentliklarining bayonotlarini sharhlamadi.
22 iyunga o‘tar kechasi AQSh Eronning Natanz, Fordo va Isfaxondagi yadroviy dastur zavodlariga bunker bombalari va Tomahavk raketalaridan foydalangan holda zarba berdi. Endi Tramp ma’muriyati yaqin 48 soat ichida Erondan javob hujumlarini kutmoqda. AQSh hukumati fuqarolarni mamlakat ichidagi teraktlar xavfi haqida ogohlantirdi. Chet eldagi amerikaliklarni ehtiyotkorlikka chaqirdi.
