Rossiya va Mali atom energetikasi sohasida hamkorlik to‘g‘risida shartnoma imzoladi

Rossiya va Mali atom energiyasidan tinch maqsadlarda foydalanish sohasida hamkorlik to‘g‘risidagi bitimni imzoladi. Bu haqda Rossiyaning «Rosatom» davlat korporatsiyasi xabar berdi.

Hujjatlarni imzolash marosimi Kremlda Rossiya prezidenti Vladimir Putin va Malining o‘tish davri prezidenti Assimi Goita o‘rtasidagi muzokaralar yakunlanganidan keyin bo‘lib o‘tdi.

Kreml matbuot xizmati xabar berishicha, Mali Respublikasining o‘tish davri prezidenti Assimi Goitaning Rossiya Federatsiyasiga rasmiy tashrifi doirasida quyidagi hujjatlar imzolangan: Rossiya va Mali o‘rtasidagi munosabatlarning asosiy tamoyillari to‘g‘risidagi bitim; Rossiya hukumati va Mali hukumati o‘rtasida savdo-iqtisodiy va ilmiy-texnikaviy hamkorlik bo‘yicha hukumatlararo Rossiya-Mali komissiyasini tashkil etish to‘g‘risidagi bitim; Rossiya hukumati va Mali hukumati o‘rtasida atom energiyasidan tinch maqsadlarda foydalanish sohasidagi hamkorlik to‘g‘risidagi bitim.

«Ushbu shartnomaning imzolanishi Rossiya va Mali o‘rtasidagi strategik sheriklikning yangi bosqichini anglatadi. Biz hamkorlarimizga energetika va ilm-fanning barqaror rivojlanishini qo‘llab-quvvatlash uchun tajriba va texnologiyalarni taqdim etishdan mamnunmiz. Tinch atom sohasidagi qo‘shma ishlar har ikki davlat uchun keng imkoniyatlar ochadi va do‘stlik va o‘zaro ishonchni mustahkamlashga hissa qo‘shadi», dedi «Rosatom» davlat korporatsiyasi bosh direktori Aleksey Lixachev.

Ta’kidlanishicha, kelishuv 2024 yil 25 mart kuni «Rosatom» davlat korporatsiyasi va Mali Energetika va suv resurslari vazirligi o‘rtasida tuzilgan Rossiya-Mali hamkorligini rivojlantirish bo‘yicha «Yo‘l xaritasi»ni ishlab chiqish maqsadida «Atomekspo» xalqaro forumi doirasida imzolangan.