Turkiyadagi zilzila bir qancha provinsiya aholisiga sezildi

Turkiya shimoli-g‘arbida kuchli zilzila sodir bo‘ldi. Zilzila mamlakatning bir qancha provinsiyalarida bir vaqtning o‘zida sezilgan.

Turkiya Favqulodda vaziyatlar va tabiiy ofatlarni boshqarish agentligi (AFAD) ma’lumotlariga ko‘ra, Istanbul yaqinidagi Chanakkale port shahrida Rixter shkalasi bo‘yicha 4,9 balli zilzila sodir bo‘lgan.

Agentlik ma’lumotlariga ko‘ra, zilzila episentri Chanakkale provinsiyasining Yenidje tumanida 10,44 km chuqurlikda joylashgan.

Eng kuchli zilzila Chanakkale ko‘rfaziga kiradigan hududda sezildi. Bu port shahri Kichik Osiyo yarim orolida, Dardanel bo‘g‘ozi sohilida joylashgan bo‘lib, Marmara va Egey dengizlarini bog‘laydi. Bundan tashqari, zilzila Istanbul, Manisa, Bursa kabi ko‘plab yaqin provinsiyalarda ham sezilgan.

Turkiya ichki ishlar vaziri Ali Yerlikayaning aytishicha, hozir vaziyat barqaror. Zilzila qurbonlari yo‘q. Rasmiylar shahardagi binolarni tekshirmoqda.


Manba: www.aniq.uz