Tramp uchinchi muddatga saylanmasligini ma’lum qildi

AQSh prezidenti Donald Tramp Oq uyda uchinchi muddatga saylanish niyatida emas, garchi u o‘tmishda bunga shama qilgan bo‘lsa ham. «Men sakkiz yil prezident bo‘laman, ikki muddat prezident bo‘laman. Men buni har doim juda muhim deb o‘ylaganman», dedi u 4 may, yakshanba kuni NBC telekanaliga bergan intervyusida.

Trampning aytishicha, uning ko‘plab ittifoqchilari, agar u 2028 yilda prezidentlikka nomzod bo‘lsa, xursand bo‘lishlarini aytgan. «Shunchalik ko‘p odamlar mendan buni so‘rayapti, menda hech qachon bunchalik ko‘p so‘rovlar bo‘lmagan. Lekin bu, bilishimcha, bajarib bo‘lmaydigan narsa. Men buni qilmayman», deb ta’kidladi u. Tramp prezident sifatida «to‘rt ajoyib yil» bo‘lishini va keyin hokimiyatni boshqa birovga – «ideal holda buyuk respublikachi»ga topshirishni rejalashtirayotganini qo‘shimcha qildi.

Make America Great Again («Amerikani yana buyuk qilamiz») siyosiy harakatining kelajagi haqidagi savolga prezident harakat boshqaruvini o‘z qo‘liga olishi mumkin bo‘lgan «katta» odamlar guruhi borligini aytdi. Ular orasida u AQSh davlat kotibi Marko Rubio va vitse-prezident Jyey Di Vensni keltirdi. «Men hozir shu yerda o‘tirgan holda 10, 15, 20 kishini aytishim mumkin», dedi Tramp o‘zining vorisi sifatida kimni ko‘rishi haqidagi savolga to‘g‘ridan to‘g‘ri javob berishdan qochgan holda.

Telekanal ta’kidlaganidek, Trampning uchinchi muddatga saylanish istagi haqidagi gap-so‘zlar, bunga to‘g‘ridan to‘g‘ri taqiq qo‘yilganiga qaramay, prezident bilan bog‘liq bo‘lgan Trump Organization kompaniyasi aprel oyida Trump 2028 logotipi tushirilgan qizil kepkalar sota boshlaganidan so‘ng avj oldi. «Kelajak porloq ko‘rinyapti! Trump 2028 kepkalari bilan qoidalarni qayta yozing», deyilgan mahsulot tavsifida.