Yevropa Ittifoqi Putinga Ukrainaga harbiy yordamni ikki baravar oshirish bilan tahdid qildi

AQSh prezidenti Donald Tramp Vladimir Putinni urushni tezda tugatishga ko‘ndira olmasa, Yevropa Ittifoqi davlatlari Ukrainaga harbiy yordamni sezilarli darajada oshirishi mumkin, dedi Yevropa Ittifoqi mudofaa komissari Andryus Kubilyus. Uning so‘zlariga ko‘ra, YeI va AQSh hozirgacha Kiyevga yiliga 40 milliard yevroga yaqin harbiy yordam ko‘rsatgan, biroq bu mablag‘larni to‘g‘ridan to‘g‘ri ukrainalik ishlab chiqaruvchilardan arzonroq qurol sotib olishga yo‘naltirish orqali samaraliroq foydalanish mumkin. «Bu xuddi shu 40 milliard yevro evaziga Ukraina oladigan qurollar miqdorini amalda ikki barobarga oshiradi. Bizning qo‘llab-quvvatlashimizning haqiqiy qiymati 80 milliard yevrogacha ko‘tariladi», deb yozdi Kubilyus 4 may, yakshanba kuni X ijtimoiy tarmog‘ida.

Yevropa komissarining eslatishicha, Yevropa Ittifoqi mamlakatlarida Ukrainaga yordam berishning yangi vositasi bor — ular Kiyev uchun harbiy xaridlarni moliyalashtirishda mudofaa kreditlaridan foydalanishlari mumkin. «Tinchlik orqali kuch» formulasi amalda aynan shunday ishlashi mumkin. Kreditlar — Ukraina uchun kuch!» — deya ta’kidladi Kubilyus.

Yevropa Ittifoqining joriy yilda qabul qilingan keng qamrovli qayta qurollanish rejasi doirasida Yevrokomissiya qurollarni birgalikda xarid qilish va ishlab chiqarishni tezlashtirish uchun 150 milliard yevro miqdorida kredit ajratadi. Yangi moliyaviy imkoniyatlar Yevropa Ittifoqi mamlakatlariga Ukrainada qurol ishlab chiqarishga sarmoya kiritish yoki Ukraina harbiy-sanoat majmuasini Yevropa bilan integratsiyalashuvini ta’minlash uchun mahalliy kompaniyalar orqali hamkorlik qilish imkonini beradi, deya tushuntirdi Yevropa komissiyasi raisi Ursula fon der Lyayyen.