Zelenskiy Putinning to‘g‘ridan to‘g‘ri muzokaralar o‘tkazish taklifiga javob qaytardi

Ukraina Rossiya tomoni 12 maydan boshlab «to‘liq, uzoq va ishonchli» tinchlik sulhiga rozi bo‘lishini kutmoqda va Kiyev Moskva bilan muzokaralar o‘tkazish uchun uchrashuvlarga tayyor. Bu haqda Ukraina prezidenti Volodimir Zelenskiy o‘zining Telegram-kanalida yozib qoldirdi.

«Ruslar va nihoyat urushni yakunlash haqida o‘ylay boshlagani — bu yaxshi belgi. Butun dunyo buni anchadan beri kutmoqda. Va urushni haqiqatda yakunlash yo‘lidagi eng birinchi qadam bu — o‘t ochishni to‘xtatish», — deydi Zelenskiy.

Ukraina prezidenti ofisi rahbari Andrey Yermak ham Kiyev o‘t ochishni to‘xtatish bo‘yicha kelishuvga erishilganidan keyin muzokaralarga rozi bo‘lishini ma’lum qildi: «Avvaliga 30 kunlik otashkesim, keyin esa qolganlari».

Shu bilan birga, na Yermak va na Zelenskiy o‘z postlarida Putinning to‘g‘ridan to‘g‘ri muzokaralar borasidagi taklifini tilga oldi.

Fransiya prezidenti va YeIga a’zo boshqa davlatlar yetakchilari 10 may kuni Ukraina prezidenti Volodimir Zelenskiy bilan Kiyevda uchrashdi. Uchrashuvdan keyin Ukraina 12 maydan boshlab «quruqlikda, havoda va dengizda kamida 30 kunlik to‘liq va so‘zsiz o‘t ochishni to‘xtatish»ga tayyor ekani e’lon qilindi. Tramp 30 kunlik otashkesimni qo‘llab-quvvatlashini bildirdi.

Rossiya prezidentining matbuot kotibi Dmitriy Peskov 10 may kuni RF hukumati o‘t ochishni 30 kunga to‘xtatish taklifi ustida bosh qotirayotganini aytib, Rossiyaga «bosim o‘tkazishga urinish» foydasiz ekanini ta’kidlagandi.

11 mayga o‘tar kechasi Rossiya prezidenti matbuot anjumani o‘tkazdi va Ukrainaga 15 may kuni Istanbulda to‘g‘ridan to‘g‘ri muzokaralarni «qayta tiklashni» taklif qildi. Putin o‘z bayonotida doirasida 30 kunga o‘t ochishni to‘xtatish haqidagi taklifga munosabat bildirmadi.