Tramp ma’muriyati noqonuniy migrantlarga qarshi kurashish uchun 20 ming askar so‘radi

AQSh Ichki xavfsizlik vazirligi (DHS) noqonuniy migrantlarga qarshi kurash doirasida Pentagondan 20 ming Milliy gvardiya askarini so‘radi, deb xabar berdi The New York Times (NYT).

Bu talab prezident Donald Tramp DHS xodimlarini 20 mingga ko‘paytirishni so‘raganidan keyin paydo bo‘ldi, deb qayd etdi NYT.

Qo‘shma Shtatlarda harbiy kuchlardan foydalanish bo‘yicha cheklovlar mavjud va Pentagon odatda ichki tadbirlar uchun askarlarni jalb qilishni istamaydi.

Tramp prezidentligi davrida Pentagon noqonuniy migrantlarga qarshi kurashish uchun chegaraga minglab askar, Stryker zirhli jangovar mashinalari, U-2 josus samolyotlari, dronlari, vertolyotlari va ikkita harbiy kemasini yuborgan.

Nashrning ta’kidlashicha, agar Trampning o‘tmishdoshi Jo Baydenning vakolat muddati oxirida chegarada 2,5 mingga yaqin faol harbiy xizmatchi bo‘lsa, hozir ularning soni 8,5 mingdan oshgan.

Respublikachi prezident mart oyida ta’kidlaganidek, amerikaliklar Ukraina kabi boshqa muammolardan ko‘ra «zo‘ravon to‘dalar, narkobaronlar, qotillar va ruhiy muassasalarda hisobda turadigan odamlarning mamlakatga kirib kelishidan» ko‘proq tashvishlanishi kerak. U AQSh «Yevropa kabi» oqibatlarga olib kelmaslik uchun noqonuniy migrantlarga qarshi keskin choralar ko‘rishi kerakligi haqida ogohlantirdi.

Avvalroq, Tramp ma’muriyati faoliyatining ilk yilida 1 milliongacha noqonuniy migrantni deportatsiya qilish niyatida ekanini ma’lum qilgan edi. Yiliga 400 mingdan ortiq deportatsiya bo‘yicha avvalgi rekord prezident Barak Obama (2009-2017) davrida o‘rnatilgan.