Pistorius: Putin Ukrainadagi urush tugashini xohlamaydi

Germaniya mudofaa vaziri Boris Pistorius Rossiya prezidenti Vladimir Putinni Ukraina inqirozini hal qilish bo‘yicha Turkiyadagi muzokaralardan so‘ng Ukrainadagi urushni tugatishdan manfaatdor emaslikda aybladi. Putin avvaliga o‘t ochishni to‘xtatish bo‘yicha muzokaralar o‘tkazish niyatini bildirdi, biroq keyin kelmay, o‘z o‘rniga uchinchi darajali delegatsiyani yubordi, dedi vazir 16 may, juma kuni Rimda Italiya, Fransiya, Buyuk Britaniya va Polshadan kelgan hamkasblari bilan uchrashuvdan so‘ng.

Pistoriusning qayd etishicha, Putin Ukraina prezidenti Volodimir Zelenskiy bilan muzokara qilishdan bosh tortmoqda. Shu tariqa, uning so‘zlariga ko‘ra, Putin hozirda bu tajovuzkor urushni tugatishdan «mutlaqo manfaatdor emasligini» ochiq ko‘rsatmoqda. «Tinch yo‘l bilan yechim topishga jiddiy intilish»dan darak yo‘q, dedi Pistorius.

Shu fonda Germaniya mudofaa vaziri yana bir bor ta’kidladi: «Yevropa va uning ittifoqchilari Ukrainani ishonchli va izchil qo‘llab-quvvatlashda davom etmoqdalar». U «Ukrainaga keng ko‘lamli yordam ko‘rsatishni» davom ettirishga va’da berdi.

Pistoriusning qo‘shimcha qilishicha, u Italiya, Fransiya, Buyuk Britaniya va Polshadagi hamkasblari bilan Kiyevga qo‘shimcha harbiy yordam ko‘rsatishdan tashqari, Ukrainada yuzaga kelishi mumkin bo‘lgan o‘t ochishni to‘xtatish bo‘yicha «monitoring»ni ham muhokama qilgan. Muhokama, xususan, «kim va qanday formatda mas’uliyatni o‘z zimmasiga olishi mumkinligi» haqida bo‘ldi, dedi u.