Ispaniyada yuzlab boshpanasizlar aeroportni «egallab oldi»

Ispaniyaning eng yirik aeroportlaridan biri — Madrid-Barajasda boshpanasizlar soni keskin oshmoqda, deb xabar beradi Daily Mail.

Ispaniya OAV ma’lumotlariga ko‘ra, aeroportdagi «ro‘yxatdan o‘tmagan fuqarolar» soni 50 kishidan qariyb 500 kishiga qadar oshgan.

Qayd etilishicha, ayniqsa vaziyat 4-sonli terminalda murakkablashgan, chunki rasmiylar oldinroq aeroportning boshqa hududlarida yashab kelgan boshpanasizlarning aksariyatini shu yerga ko‘chirgan. Guvohlar hojatxonalar poli, ekranlar orti va restoranlar zalida uxlab yotgan insonlarni suratlarga olgan. Aeroport xodimlari sanitariya sharoiti yomonlashgani, tajovuz holatlaridan shikoyat qilyapti — ba’zi uysizlar pichoq ko‘tarib, giyohvand moddalar ham iste’mol qilmoqda.

Yaqinda qandalalar ko‘payishi xavfi sabab alohida hududlarni dezinfeksiya qilishga to‘g‘ri kelgan. Kasaba uyushmalari xodimlari turistlarni himoya qilish va boshpanasizlarni kerakli sharoitlar bilan ta’minlash uchun zudlik bilan choralar ko‘rilishini talab qilmoqda.

Aeroportdan qo‘nim topganlarning aksariyati — mehnat bozoridagi omadsizliklardan keyin boshpanasidan ayrilgan migrantlardir. Ismi Fernando bo‘lgan perulik erkakning tan olishicha, u tunab ketilishi xavfi borligi sabab «bir ko‘zini ochgan holda» uxlashga majbur bo‘lmoqda. Shu bilan birga, uning aytishicha, barcha boshpanasizlar ham xavf tug‘dirmaydi va ularning aksariyati shunchaki murakkab hayotiy vaziyatga tushib qolgan.

Nashrga ko‘ra, rasmiylar ehtimoliy choralarni muhokama qilib, politsiya terminallarni nazoratdan o‘tkazayotgan bir payda polda uxlayotgan fuqarolar soni o‘sishda davom etmoqda.