Dunyo yangiliklari, Дунё янгиликлари, Мировые новости, World news
Ovozlarning 99 foizi hisoblanganidan so‘ng, Ruminiyadagi prezidentlik saylovlarida Nikushor Dan Jorj Jorjye Simiondan oldinda. Simion mag‘lubiyatni tan olmadi.
Foto: Andreea Alexandru/AP/picture alliance
Buxarestning liberal-progressiv meri Nikushor Dan Ruminiyada prezidentlik saylovlarining ikkinchi bosqichida g‘alaba qozondi, deb xabar bermoqda AFP mamlakat saylov byurosi ma’lumotlariga tayanib. Saylov byulletenlarining qariyb 99 foizi hisoblanganidan keyin u 54 foiz ovozga ega bo‘lib, raqibi, 46 foiz ovoz olgan o‘ta o‘ngchi Jorjye Simionni ortda qoldirdi.
Danning g‘alabasi Shahar va mintaqaviy sotsiologiya markazi (CURS) va Avangarde ijtimoiy va xulq-atvor tadqiqot guruhi tomonidan o‘tkazilgan ekzitpollar ma’lumotlari bilan ham tasdiqlandi.
Shu bilan birga, Simion dastlab dastlabki ma’lumotlarni rad etdi va o‘zining g‘alabasini e’lon qildi. «Biz bu saylovlarda aniq g‘olibmiz. Biz bu g‘alabani Ruminiya xalqi nomidan e’lon qilamiz», dedi u Buxarestdagi jonli efirda ovoz berish uchastkalari yopilgandan keyin tarafdorlariga.
U xuddi shunday bayonotlarni Facebook va X mikrobloglar tarmog‘ida qilgan. Keyinchalik u mag‘lubiyatini tan oldi va Danni tabrikladi. «U saylovda g‘alaba qozondi va bu Ruminiya xalqining irodasi», deb yozadi Simion.
Ruminiyada prezidentlik saylovining birinchi bosqichi 4 may kuni bo‘lib o‘tdi. Natijalarga ko‘ra, Simion 41 foizga yaqin, Dan 20,99 foiz ovoz olgan.
