Qozog‘istonga Markaziy Osiyodagi eng kuchli superkompyuter keltirildi

Qozog‘istonga Markaziy Osiyodagi eng kuchli kompyuter yetib keldi, deb xabar berdi mamlakat Raqamli rivojlanish, innovatsiyalar va aerokosmik sanoat vazirligi.

Uning unumdorligi taxminan ikki ekzaflops. Bir ekzaflops unumdorlik kompyuter 1 soniyada kvintillion (18 ta nolli raqam) operatsiyani bajarishi mumkinligini anglatadi.

«Bu Markaziy Osiyo mintaqasi tarixidagi birinchi superkompyuter klasteridir. U eng so‘nggi NVIDIA H200 grafik chiplarida qurilgan bo‘lib, sun’iy intellekt va yuqori unumli hisoblash uchun mo‘ljallangan», deyiladi vazirlik xabarida.

Superkompyuter Raqamli rivojlanish vazirligining yangi ma’lumotlar markaziga o‘rnatiladi. Undan foydalanish huquqi neyron tarmoqlarni o‘qitish uchun quvvatga muhtoj bo‘lgan startaplarga, fundamental va amaliy tadqiqotlar o‘tkazish uchun universitetlar, tadqiqot markazlari va biznes jarayonlarida sun’iy intellektni joriy qiluvchi kompaniyalarga beriladi.

Rasmiylarning ta’kidlashicha, superkompyuterning yetkazib berilishi Qozog‘istonda yuqori unumli hisoblash ekotizimini rivojlantirishga yo‘l ochgan. Vazirlik ushbu ta’minot bilan Qozog‘iston birinchi marta yuqori texnologiyali uskunalarni QQS va bojsiz olib kirish mexanizmini qo‘llaganiga ham e’tibor qaratdi.

Agentlik superkompyuter yetkazib beruvchi tashkilot nomini aytmadi, biroq Abu-Dabi valiahd shahzodasi shayx Xolid bin Muhammad bin Zayd Ol Nahayonning Qozog‘istonga yaqinda yuz bergan tashrifi chog‘ida Ostona shahrida Presight (G42) kompaniyasining xorijiy vakolatxonasi tantanali ochilish marosimi bo‘lib o‘tganini eslatdi. Shu bilan birga, Qozog‘iston Raqamli rivojlanish vazirligi va ushbu kompaniya o‘rtasida mamlakatda superkompyuterlar klasterini yaratish bo‘yicha kelishuv imzolandi.