Bastrikin Mariupolni blokadada bo‘lgan Leningrad bilan taqqosladi

Rossiya Federatsiyasi Tergov qo‘mitasi rahbari Aleksandr Bastrikin Ukrainaga keng ko‘lamli bostirib kirish chog‘ida rus qo‘shinlari tomonidan vayron qilingan Ukrainaning Mariupol shahrini Ikkinchi jahon urushi davrida fashistlar qo‘shinlari harakatlaridan jabr ko‘rgan Leningrad bilan solishtirdi. «Meni shahar qanchalik yomon vayron qilingani hayratda qoldirdi. Bu shunchaki hayratlanarli edi. Men qurshovdagi Leningradni Mariupol bilan solishtirgan bo‘lardim — nemislar qamalda bo‘lgan Leningradni reja bo‘yicha bombardimon qilishgan. Ertalab soat 7 da va 19 da. Ko‘p sonli shikastlangan binolar, buni fotosuratlarda, blokadaga bag‘ishlangan kitoblarda ko‘rishingiz mumkin», dedi Bastrikin Sankt-Peterburg xalqaro yuridik forumida. Uning so‘zlariga ko‘ra, Mariupol «yer yuzidan deyarli yo‘q qilingan» va «u yerda hech qanday harbiy obektlar yo‘q edi».

Ukraina metallurgiyasining eng muhim markazlaridan biri va yirik dengiz porti bo‘lgan Mariupol Ukrainada keng ko‘lamli urush boshlanganidan keyin rus qo‘shinlari uchun ustuvor nishonga aylandi. 2022 yil 24 fevraldan boshlab Rossiya hududni artilleriya va havo zarbalariga duchor qildi. Natijada binolarning 90 foizi shikastlangan yoki vayron bo‘lgan. Mart oyida qamaldagi shaharda dori-darmon, oziq-ovqat, elektr va suv taqchilligi tufayli gumanitar inqiroz yuzaga kelgan edi. Shaharning so‘nggi himoyachilari 81 kunlik qamaldan so‘ng 2022 yil 20 mayda taslim bo‘lishdi.

Ukraina rasmiylariga ko‘ra, urushdan oldin shaharda istiqomat qilgan 400 mingdan ortiq aholidan 22 mingga yaqini Mariupolga hujum paytida halok bo‘lgan.