Daniyada pensiya yoshi oshiriladi

Daniya parlamenti pensiya yoshini bosqichma-bosqich 70 yoshga qadar oshirishni nazarda tutuvchi qonun loyihasini tasdiqladi.

Unga ko‘ra, o‘zgarishlar bosqichma-bosqich amalga oshiriladi: 2030 yilga borib daniyaliklar 68 yoshdan, 2035 yilda — 69 yoshdan, 2040 yilda esa 70 yoshdan pensiyaga chiqishlari mumkin. Hozirda mamlakatda 67 yoshdan pensiyaga chiqiladi.

Mazkur tashabbusni Folketing (parlament) deputatlarining aksariyati qo‘llab-quvvatlagan — yig‘ilishda ishtirok etganlarning 81 nafari. Shuningdek, 21 nafar parlamentariy qonun loyihasiga qarshi chiqqan.

Islohotni qo‘llab-quvvatlovchilar buni o‘zgaruvchan demografik vaziyatga moslashish zarurati bilan izohlamoqda — mamlakatda umr ko‘rish davomiyligi barqaror o‘sib boryapti. Biroq hamma ham bu yangilikni xursandchilik bilan qabul qilgani yo‘q: kasaba uyushmalari vakillari allaqachon xavotir bildirib, har kim ham bunday yoshgacha samarali ishlay olmasligini ta’kidlagan.

Shunga qaramay, Daniya rasmiylari yangi yondashuv kelajakda pensiya tizimining barqarorligini ta’minlashga xizmat qilishini aytmoqda.