Bank of Georgia rossiyaliklarning lyuks do‘konlardagi xaridlarini chekladi

Gruziyaning yirik banklaridan biri Bank of Georgia (BoG) rossiyalik mijozlar uchun lyuks do‘konlarda 300 dollar yoki yevrodan ortiq miqdordagi xaridlarni chekladi, deb xabar berdi RBK agentligi 22 may, payshanba kuni.

RBK yozishicha, BoG bu cheklovlarni regulyatorning talabi sifatida tushuntirdi. Bunga Rossiyaga qiymati ushbu miqdordan oshib ketadigan hashamatli tovarlarni yetkazib berishni taqiqlovchi sanksiyalar sabab bo‘ldi. Cheklovlar nafaqat Gruziyada, balki butun dunyoda qo‘llanadi, deb da’vo qilmoqda RBK. Agentlik ko‘rib chiqqan bankning mijozlar axborot byulletenida aytilishicha, agar mijozlar yashash joyini o‘zgartirsa, Bank of Georgia bilan bog‘lanishlari mumkin.

Rossiyaning Ukrainaga bostirib kirishi boshlangandan so‘ng, Yevropa Ittifoqi 4-sanksiya paketi doirasida Rossiyaga qiymati 300 yevrodan ortiq bo‘lgan hashamatli tovarlarni yetkazib berishni taqiqladi. Bunday tovarlarni Rossiyada ham, «Rossiyada foydalanish uchun» ham jismoniy va yuridik shaxslarga sotish taqiqlanadi.

"Bu katta pretsedent: hashamatli tovarlarga nisbatan sanksiyalar 2022 yilda joriy qilingan, lekin birinchi marta ularning amalga oshirilishi bank tomonidan nazorat qilinadi. Ilgari butiklarning o‘zi (masalan, Chanel) ularga rioya qilishga harakat qilgan, ammo ular uchun kassada ruslarni aniqlash juda qiyin va ko‘p mehnat talab qilgan", deya ta’kidlaydi RBK.

Ilgari rossiyaliklar chet el butiklarida hashamatli buyumlarni sotib olishda muammolarga duch kelishgan, biroq bu holatlar epizodik bo‘lgan, deb yozadi Forbes. RBK'ga intervyu bergan ekspertlarning ta’kidlashicha, ular hali biron bir boshqa bank ruslar tomonidan hashamatli do‘konlarda amalga oshirilgan to‘lovlarni nazorat qila boshlagan holatlardan xabardor emas.