Moskvada bloger o‘g‘irlab ketildi va keyin qo‘yib yuborildi

Moskvada noma’lum shaxslar tadbirkor va bloger Areg Shchepixinni o‘g‘irlab ketib, keyin qo‘yib yubordi. 4 iyun, chorshanba kuni Checheniston milliy siyosat vaziri Axmed Dudayevning Telegramʼdagi sahifasida yozishicha, qo‘lga olingan va avtomobil yukxonasida olib ketilgan shaxs «musulmonlarni haqorat qilgan» bayonotlari yuzasidan «Moskovaning tegishli idoralari bilan» ishlagan «huquq-tartibot idoralari xodimlari» tomonidan qo‘lga olingan.

Checheniston vaziri Shchepixinni «ochiq, oshkora va qayta-qayta etnik tozalash va natsizmga chaqirgan, dinni haqorat qilgan, shuningdek, ekstremistik qarashlarni ifoda etgan» jinoyatchi deb atagan. Unga ko‘ra, uni «yuz minglab musulmonlar» javobgarlikka tortishni talab qilgan, uning xatti-harakati haqidagi ma’lumotlar huquq-tartibot idoralariga Checheniston Davlat dumasi deputatlari tomonidan yetkazilgan.

O‘z navbatida, Rossiya IIV «Yaroslavskiy vokzalida jamoatchilik noroziligiga sabab bo‘lgan voqeaning olti nafar ishtirokchisi» qo‘lga olingani haqida xabar berdi. «Ular tergov uchun Moskva-Yaroslavskaya stansiyasidagi Rossiya IIV LUga olib ketildi. Shundan so‘ng tergov materiallarini tergov organlariga o‘tkazish to‘g‘risida qaror qabul qilindi», deb yozadi idora.

Bundan tashqari, Rossiya Ichki ishlar vazirligining Ekstremizmga qarshi kurash bosh boshqarmasi «ijtimoiy tarmoqlarda Checheniston Respublikasi aholisiga nisbatan provokatsion bayonotlar bilan videolarni joylashtirgan blogerga nisbatan» tergov olib bormoqda.

Keyinroq Rossiya Federatsiyasi Tergov qo‘mitasi blogerni o‘g‘irlashda gumon qilingan olti nafar shaxs Tergov qo‘mitasi Moskva boshqarmasiga olib ketilgani va jinoiy ish doirasida qo‘lga olinishini ma’lum qildi.