Dunyo yangiliklari, Дунё янгиликлари, Мировые новости, World news
Buyuk Britaniya, Avstraliya, Kanada, Yangi Zelandiya va Norvegiya Betsalel Smotrich va Itamar Ben-Gvirni G‘arbiy sohilda falastinliklar huquqlarini poymol qilishga undaganlikda aybladi.
Foto: Getty images
Buyuk Britaniya, Avstraliya, Kanada, Yangi Zelandiya va Norvegiya Isroil moliya vaziri Betsalel Smotrich va milliy xavfsizlik vaziri Itamar Ben-Gvirga nisbatan sanksiyalar joriy qildi, deya xabar beradi jahon agentliklari 10 iyun, seshanba kuni. Buning sababi sifatida «Iordan daryosining G‘arbiy sohilida falastinliklarga qarshi zo‘ravonlikka undash» ko‘rsatilgan.
«Biz ikki davlat qaroriga sodiqmiz, bu isroilliklar va falastinliklarning xavfsizligi va qadr-qimmatini kafolatlash va mintaqada uzoq muddatli barqarorlikni ta’minlashning yagona yo‘li, ammo u ekstremistik ko‘chmanchilar zo‘ravonligi va aholi punktlarining kengayishi tahdidi ostida», — deyiladi Britaniya Tashqi ishlar vazirligi saytida e’lon qilingan qo‘shma bayonotda.
«Itamar Ben-Gvir va Betsalel Smotrich falastinliklarga nisbatan ekstremistik zo‘ravonlik va jiddiy inson huquqlari buzilishiga undagan. Falastinliklarni majburiy ko‘chirish va Isroilning yangi aholi punktlari barpo etilishini targ‘ib qiluvchi ekstremistik ritorika dahshatli va xavflidir. Bu harakatlarni qabul qilib bo‘lmaydi», — deya ta’kidlaydi mualliflar.
Ular Isroil hukumatini «xalqaro huquq bo‘yicha o‘z majburiyatlarini bajarishga hamda ekstremistik, zo‘ravonlik va ekspansionistik ritorikaga barham berish uchun muhim choralar ko‘rishga» chaqirmoqda.
https://www.dw.com/ru/pat-stran-vveli-sankcii-protiv-dvuh-izrailskih-ministrov/a-72863541
