Ko‘plab avtobus bekati talabga javob bermaydi – Raqobat qo‘mitasi

Respublika bo‘ylab o‘rganish ishlari davomida 2800 dan ortiq avtobus bekatida qator kamchiliklar aniqlandi, deya xabar berdi Raqobat qo‘mitasi.

Qayd etilishicha, qo‘mita va uning hududiy boshqarmalari tomonidan tanlanma usulida 2800 tadan ortiq bekat faoliyati o‘rganib chiqilgan. O‘rganishlarda belgilangan normalarga nomuvofiq faoliyat ko‘rsatayotgan ba’zi bekatlarda quyidagi kamchiliklar aniqlangan:

• 286 ta holatda kutish zallarining uchta tomoni maxsus to‘siqlar bilan yopilmagani sababli yo‘lovchilar issiq va sovuq havodan himoyalanmagan;
• 210 ta holatda kutish zallarida savdo shoxobchalari joylashtirilgan;
• 387 ta holatda nogironlar uchun maxsus ko‘tarma panduslar mavjud emas;
• 412 ta holatda kutish zallarida elektr yoritgichlar o‘rnatilmagan;
• 57 ta holatda yomg‘ir, qor va shamolli kunlarda yo‘lovchilar uchun pavilon mavjud emas;
• 156 ta holatda bekat nomi yozilgan ko‘rsatkich qo‘yilmagan;
• 255 ta holatda yo‘nalishning tartib raqami mavjud emas.

Qo‘mita aniqlagan kamchiliklarni bartaraf etish uchun Transport vazirligi, Qoraqalpog‘iston Vazirlar Kengashi va viloyat hokimliklariga tegishli ko‘rsatmalar yuborgan.