O'zbekiston yangiliklari, Ўзбекистон янгиликлари, Новости Узбекистана, Uzbekistan news
Eron Islom Respublikasi fuqarolariga O‘zbekistonga vizasiz rejimda kirish imkoniyati berilishi mumkin. Ikki davlat hukumati buni muhokama qilmoqda. Eronning O‘zbekistondagi elchixonasi va O‘zbekiston TIV buni tasdiqlab, muloqot hali davom etayotganini bildirdi.
Foto: Getty images
Eron elchixonasi vakiliga ko‘ra, O‘zbekiston fuqarolari ayni paytda Eronga yiliga ikki marta ikki haftadan vizasiz rejimda borishlari mumkin. Biroq, O‘zbekiston TIVning Kun.uz’ga ma’lum qilishicha, rasmiy kelishuvlarda belgilanganidek O‘zbekiston fuqarolari faqat 10 kun bu mamlakatda vizasiz tartibda bo‘la oladi.
“O‘zbekiston fuqarolari Eronga 10 kungacha bo‘lgan muddat mobaynidagina vizasiz kirishlari mumkin. Eron fuqarolari esa O‘zbekistonga kirishi uchun elektron viza olishlari talab etiladi”, - deydi TIV rasmiy vakili Ahror Burhonov.
Elchixona muvaqqat ishlar vakili Husayn Parvareshning aytishicha, O‘zbekiston fuqarolari uchun Eronga vizasiz borish huquqi berilgach, sayohat qiluvchilarning soni sezilarli ravishda ko‘paygan. Tehron-Toshkent aviaqatnovlariga talab juda yuqoriligi sabab chiptalar tez sotilib ketmoqda.
Ikki davlat o‘rtasida tibbiyot turizmi ham rivojlanmoqda. Elchixonaning qo‘shimcha qilishicha, Eron tibbiy muassasalarida o‘zbekistonlik bemorlar borib davolanishi uchun imkoniyat va sharoit yaratish masalalari ham muhokamada.
Bu masala ijobiy hal qilinsa, Eronga boruvchi o‘zbekistonliklar soni yanada ortishi mumkin, deydi Husayn Parvaresh.
O‘zbekiston TIVga ko‘ra, juda ko‘p davlatlar bilan vizasiz rejimni joriy qilish muhokamada, lekin vazirlikning asosiy e’tibori ko‘proq O‘zbekiston fuqarolarining xorijiy davlatlarga vizasiz borishini ta’minlashga qaratilgan.
