“Ruhiy bosim o‘tkazgan” - Samarqandda o‘quvchilarni qattiq koyigan o‘qituvchi intizomiy jazo oldi

Samarqand viloyati Bulung‘ur tumani 37-maktabning o‘qituvchisi o‘quvchilar bilan qo‘pol munosabatda bo‘lgani aytilgan xabarlar yuzasidan Samarqand maktabgacha va maktab ta’limi boshqarmasi rasmiy izoh berdi.

Qayd etilishicha, mazkur o‘qituvchi maktabdagi 2-“a” sinfiga rahbarlik qiladi. O‘qituvchi 3-soat – o‘qish fani dars mashg‘ulotlari tugagandan so‘ng, 5 daqiqalik tanaffus vaqtida 2-“a” sinf o‘quvchilarining boshqa sinf o‘quvchilari o‘rtasida kelishmovchiligiga guvoh bo‘lgan. Ularni tartibga chaqirish maqsadida 4-soatda ota-onasini chaqirishini aytib ruhiy bosim o‘tkazgan.

Rasmiylarga ko‘ra, o‘qituvchining dars jarayonidagi holati pedagog odobiga to‘g‘ri kelmaydi, shu sabab unga nisbatan intizomiy jazo chorasi, oylik ish haqining 30% miqdorida jarima qo‘llanishi belgilangan.