Sutchilik tarmog‘ini rivojlantirishga 53 mln dollar ajratiladi

Loyiha chorvachilikning sutchilik tarmog‘ini jadal rivojlantirish, sut mahsulotlarini qayta ishlovchi korxonalarning moliyaviy barqarorligini oshirishga yo‘naltirilgan.

Loyihaning asosiy yo‘nalishlari:

• Jizzax, Qashqadaryo, Sirdaryo, Samarqand va Surxondaryo viloyatlarida 320 ta mahallaga, 12 ming aholi va sut yetishtiruvchi dehqon xo‘jaliklariga xizmat ko‘rsatuvchi 100 ta sut yig‘ish punktini yaratish;
• 865 nafar jismoniy shaxs va dehqon xo‘jaliklariga sutni qayta ishlovchi korxonalarni yaratish va modernizatsiya qilish uchun 250 ming dollargacha imtiyozli kreditlar ajratishni tashkil etish;
• mahalliy mutaxassislarni chorva mollarning mahsuldorligini oshirish usullariga xorijiy tajriba asosida o‘qitish;
• sut yetishtiruvchilar va sotib oluvchilarni birlashtiradigan «Milliy sut mahsulotlari» platformasini ishga tushirish.

Loyihaning umumiy qiymati 53,01 mln dollar ekvivalentida bo‘lib, shundan:

• Qishloq xo‘jaligini rivojlantirish xalqaro jamg‘armasining imtiyozli krediti – 30 mln dollar, shuningdek 5 yillik imtiyozli davrni o‘z ichiga olgan 25 yilga 7,8 mln dollar miqdoridagi kredit;
• loyiha ishtirokchilarining (benefitsiarlar) ulushi – 5,94 mln dollar ekvivalentidagi mablag‘lar;
• • O‘zbekistonning ulushi – 9,27 mln dollar ekvivalentidagi mablag‘lar (soliq, bojxona to‘lovlari va ofis ijarasi xarajatlarini to‘lash, investitsiya davrida moliyaviy xarajatlar ko‘rinishida).

Hujjat bilan quyidagilar tasdiqlandi:

• «O‘zbekistonning sutchilik sohasida qo‘shilgan qiymat zanjirini rivojlantirish (2-bosqich)» loyihasining asosiy texnik-iqtisodiy parametrlari;
• Loyiha bo‘yicha Qishloq xo‘jaligini rivojlantirish xalqaro jamg‘armasi kreditlaridan foydalanish sxemasi;
• kreditlardan foydalanish va ularni qaytarish, komissiya va foiz to‘lovlarini to‘lashning prognoz jadvallari;
• loyihani amalga oshirish bo‘yicha «Yo‘l xaritasi».