Vengriya O‘zbekistonda dori ishlab chiqarishni yo‘lga qo‘ymoqchi

Vengriyaning Budapesht shahrida xizmat safari bilan bo‘lgan Farmatsevtika tarmog‘ini rivojlantirish agentligi direktori Abdulla Azizov Gedeon Richter va MEDITOP Pharmaceutical kompaniyalari rahbarlari bilan uchrashuvlar o‘tkazdi. 

Uchrashuvlar davomida O‘zbekistonda talab yuqori bo‘lgan dori vositalarini investitsiya kiritish orqali va shartnoma asosida ishlab chiqarishni yo‘lga qo‘yish masalalari muhokama qilindi. Shuningdek, bu yo‘nalishda amaliy harakatlar rejasi belgilab olindi. 

Shu bilan birga, investitsiya loyihalari doirasida mahalliylashtirish jarayonlarida davlat tomonidan ko‘rsatiladigan qo‘llab-quvvatlash mexanizmlari, “Hayotiy zarur dori vositalari” ro‘yxatini shakllantirishda jahon tajribasini inobatga olish hamda mahalliylashtirishning iqtisodiy samaradorligi yuzasidan hamkorlik yo‘nalishlari belgilab olindi.