Sog‘liqni saqlash sohasining yangi modeli qanday joriy etiladi?

Hujjat bilan prezidentning PF-88-son farmonini ijro etish vazifalari belgilandi. Ular 2025 yil 1 iyuldan respublikaning 15 ta tuman (shahar)larida, Samarqand viloyatida esa 2026 yil 1 yanvardan sog‘liqni saqlash tizimini tashkil etishning yangi modelining tajriba-sinov loyihasini joriy etishga yo‘naltirilgan:

• birlamchi tibbiy-sanitariya yordami muassasalari faoliyatini tubdan qayta ko‘rib chiqish orqali oilaviy poliklinikalarda ko‘rsatiladigan tibbiy xizmatlar sifat va samaradorligini oshirish;
• tibbiy yordam ko‘rsatishda tibbiyot muassasalari, aholi va tibbiyot xodimlarini aniq vazifalar, huquq va majburiyatlar bilan ta’minlash;
• tibbiyot xodimlarining bilim va malakasini oshirish, ularning mehnatiga munosib haq to‘lash tizimini joriy etish;
• aholiga tibbiy xizmatlar ko‘rsatishda qisqa muddatli choralarni o‘z ichiga olgan "Tibbiyotda 90 kunlik o‘zgarishlar" dasturini amalga oshirish.

Tuman (shahar) sog‘liqni saqlash bo‘limlari amaldagi birlamchi tibbiy-sanitariya yordami muassasalarini xatlovdan o‘tkazadi va ularni Tajriba-sinov loyihasi talablariga muvofiq yuridik shaxs maqomiga ega tegishli tipdagi oilaviy poliklinika shaklida qayta tashkil etadi.

Ko‘p tarmoqli markaziy poliklinikalar markaziy shifoxonalarning maslahat-diagnostika bo‘linmalariga aylantiriladi.

Tuman (shahar) sog‘liqni saqlash bo‘limlari – mustaqil balansga, shaxsiy g‘azna hisobvaraqlariga va davlat gerbi tasviri tushirilgan muhrga ega davlat boshqaruvi organi. O‘z faoliyatida tegishli tuman (shahar) hokimligi va sog‘liqni saqlash boshqarmasiga bo‘ysunadi.

Tuman (shahar) sog‘liqni saqlash bo‘limlari xodimlariga hujjat bilan tasdiqlangan tarif razryadlari qo‘llanilgan holda ish haqi hisoblanadi. Bunda tuman (shahar) sog‘liqni saqlash bo‘limlariga bo‘ysunuvchi tibbiyot muassasalari tomonidan pulli asosda ko‘rsatilgan tibbiy xizmatlardan tushumlarning 2 foizi ushbu bo‘limlarning budjetdan tashqari rivojlantirish jamg‘armasiga o‘tkaziladi.

Tajriba-sinov loyihasi doirasida oilaviy poliklinikalar quyidagilarni amalga oshirishga majbur:

• tibbiyot brigadalari va biriktirilgan aholi o‘rtasida kelishuv tuzish;
• kafolatlangan paket doirasida tibbiy xizmatlarni o‘z vaqtida va sifatli ko‘rsatishni ta’minlash;
• biriktirilgan aholi soni asosida Davlat tibbiy sug‘urtasi jamg‘armasi bilan xarid shartnomalari tuzish;
• autsorsing asosida oilaviy shifokor, pediatr, stomatolog, akusher-ginekolog va diagnostika bo‘yicha mutaxassislarning xizmatlarini ko‘rsatishni joriy etish;
• oilaviy shifokorlar faoliyatini ular xizmat ko‘rsatayotgan aholi soni asosida muntazam baholash;
• individual davolash va sog‘lomlashtirish dasturlariga muvofiq kafolatlangan paket doirasida aholini zarur dori vositalari bilan bepul ta’minlashni ta’minlash va h.k.

 
2025 yil 1 iyuldan boshlab respublikaning barcha davlat tibbiyot muassasalarida kasalliklarning og‘irlik darajasi va davolashning murakkabligidan kelib chiqib maxsus ko‘nikmalarni talab qiladigan davolash choralari va yuqori xavf darajasidagi amaliyotlarni samarali amalga oshirgan shifokorlarga oylik lavozim maoshlarining 25 foizdan 100 foizgacha ustama to‘lash tizimi joriy etiladi.

Qaror bilan Tajriba-sinov loyihasi doirasida tibbiyot muassasalarini ta’minlash uchun axborot-kommunikatsiya jihozlari va tarmoq qurilmalari ro‘yxati tasdiqlandi.

Tajriba-sinov loyihasi doirasida birlamchi tibbiy-sanitariya yordami muassasalari va tuman (shahar) markaziy shifoxonalarining shifokor va o‘rta tibbiyot xodimlari shaffof o‘tkaziladigan imtihonlar asosida ishga qayta rasmiylashtiriladi.

2025 yil 1 iyundan boshlab dastur doirasida tibbiyot muassasalarida aholi uchun qulay sharoitlar yaratish va uning tibbiyotga bo‘lgan ishonchini oshirish maqsadida qisqa muddatda:

• tibbiyot muassasalarida kutish zallari tashkil qilinadi, ular o‘rindiqlar bilan ta’minlanadi, qulay ro‘yxatxonalar tashkil etiladi, onlayn qabulga yozilish imkoniyatlari kengaytiriladi;
• "Ona va bola" xonasi tashkil qilinadi, xonalar va yo‘laklar tejamkor zamonaviy yoritish qurilmalari bilan jihozlanadi;
• sanitariya-gigiyena xonalari ta’mirlanadi, ular shaxsiy gigiyena vositalari bilan ta’minlanadi.