Madaniyat va san’at sohasidagi startap-loyihalar uchun grant ajratiladi

Hujjat bilan madaniyat va san’at sohasida iqtidorli yoshlarni qo‘llab-quvvatlash tizimini yangilash va yangi bosqichga olib chiqishning ustuvor yo‘nalishlari belgilandi:

• ijodkor yoshlarni aniqlash, iste’dodlarini yuzaga chiqarish, shuningdek, qiziqishlarini yanada oshirish orqali madaniyat va san’at sohasiga jalb qilish;
• ijodkor yoshlarni tanlash va saralash, ushbu jarayonga raqamli texnologiyalar hamda zamonaviy, innovatsion va integratsiya usullarini joriy etish;
• «ustoz-shogird» an’analariga muvofiq professional ijodkorlarni shakllantirish va yosh kadrlar tajribasini oshirish;
• ijodkor yoshlarni har tomonlama qo‘llab-quvvatlash, shuningdek, moddiy va ma’naviy jihatdan rag‘batlantirish hamda ularga munosib ijodiy muhit yaratish;
• iste’dodli yoshlarning ijodini keng ommaga, shu jumladan, xalqaro miqyosda tanitish va targ‘ib qilish choralarini ko‘rish.

 
Ijodkor yoshlar faoliyatini muvofiqlashtiruvchi yagona platforma joriy etilishi va uni «ERP madaniyat» yagona boshqaruv tizimiga integratsiya qilish rejalashtirilmoqda.

Shuningdek, madaniyat sohasida sun’iy intellektdan hamda zamonaviy texnologiyalardan foydalanish va tajriba-sinov loyihalarini amalga oshirish bo‘yicha «Ijodiy texnolaboratoriya» tashkil etiladi.

Umumiy o‘rta va o‘rta maxsus ta’lim tashkilotlarida madaniyat va san’atga qiziquvchi yoshlardan iborat «Ijodkor yoshlar klubi» yaratiladi.

Madaniyatshunoslik va san’atshunoslik yo‘nalishlari bo‘yicha ilmiy ish olib borayotgan yoshlarga xorijiy mamlakatlarda o‘tkaziladigan konferensiyalarda ishtirok etish, malakasini oshirish va tajriba almashishlarida ko‘maklashiladi.

Madaniyat va san’at sohasidagi startap-loyihalar uchun  BHMning 100 baravarigacha miqdorda ijodiy grantlar ajratish choralari ko‘riladi.

Hujjat bilan quyidagilar tasdiqlandi:

2025-2030 yillarda ijodkor yoshlarni tanlash, saralash va ularni qo‘llab-quvvatlash hamda rag‘batlantirish bo‘yicha chora-tadbirlar dasturi;
2030 yilgacha yoshlar o‘rtasida madaniyat va san’at sohasiga oid o‘tkaziladigan tanlov va festivallarning natijadorligini oshirishga erishish bo‘yicha maqsadli ko‘rsatkichlar.