O‘zbekiston Mobiuz kompaniyasini xalqaro sotuvga qo‘ydi

Davlat aktivlarini boshqarish agentligi “Universal Mobile Systems” MChJ (savdo belgisi – Mobiuz) ustav kapitalidagi 100 foiz davlat ulushini xususiylashtirish bo‘yicha xalqaro ochiq savdo jarayoni boshlanganini e’lon qildi.

Rothschild & Co xalqaro investitsiya banki bitim bo‘yicha yetakchi strategik va moliyaviy konsultant sifatida jalb etilgan. Moliyaviy, soliq va yuridik ekspertiza (“vendor due diligence”) o‘tkazish KPMG'ga topshirilgan. Deloitte mustaqil baholovchi sifatida ishtirok etadi.

2024 yil yakuniga ko‘ra, Mobiuz'ning sof tushumi 2 086 mlrd so‘mni, abonentlari soni 7,8 mln nafarni tashkil etgan.

Qayd etilishicha, xususiylashtirish ochiq raqobat asosida amalga oshiriladi, unda ham mahalliy, ham xalqaro darajada barcha qiziquvchilar qatnashishi mumkin.

Savdo uch bosqichda amalga oshiriladi:

• sotib olishga qiziqish bildirish;
• majburiyatga ega bo‘lmagan takliflarni qabul qilish;
• majburiyatga ega bo‘lgan takliflarni qabul qilish

Qiziqish bildirish to‘g‘risidagi arizalar 2025 yil 1 avgust Toshket vaqti bilan soat 18:00 ga qadar qabul qilinadi.

Kelib tushgan arizalar quyidagi mezonlar asosida saralanadi:

• aktivni sotib olish uchun moliyaviy resurslarining yetarliligi;
• xususiylashtirish jarayonida ishtirok etilishini taqiqlashi mumkin bo‘lgan ma’muriy, hakamlik yoki boshqa sud jarayonlarining yo‘qligi;
• “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish to‘g‘risida”gi O‘zbekiston Respublikasi qonuniga rioya etilishi;
• talabgor va uning aksiyadorlari/ishtirokchilarining hech biri davlat kompaniyasi emasligi;
• talabgor va uning tegishli shaxslaridan hech biri Yevropa Ittifoqi va AQShning, shuningdek yirik xalqaro moliya institutlarining (Jahon banki, Yevropa tiklanish va taraqqiyot banki, Osiyo taraqqiyot banki) sanksiyalari ro‘yxatiga kiritilmagan bo‘lishi;
• ariza topshirilgan sanada talabgor sanksiyalangan shaxs yoki yuqorida aytib o‘tilgan sanksiya organlari tomonidan har qanday ish yoki tergov obekti bo‘lmasligi;
• talabgor va uning tegishli shaxslaridan hech biri sanksiyalar rejimiga zid har qanday faoliyatga (to‘g‘ridan to‘g‘ri yoki biron bir sho‘ba korxonasi orqali) jalb etilmagan bo‘lishi;
• talabgor va uning tegishli shaxslaridan birortasining asosiy moliyalashtiruvchi tomonlari yoki kreditorlari sanksiyadagi shaxslar yoki sanksiyadagi shaxslarga tegishli bo‘lgan yoki ular tomonidan egalik va nazorat qilinadigan banklar yoki moliya institutlari bo‘lmasligi.

Eslatib o‘tamiz, aprel oyida imzolangan prezident farmoniga asosan, sotiladigan yirik kompaniyalar ro‘yxatiga Mobiuz'dan tashqari UzAuto Motors, GTL, “O‘zmetkombinat” va boshqalar ham kiritilgan.