Yangi hosildan bug‘doy xarid qilish choralari belgilandi

2025 yil don hosilidan boshlab, davlat resurslari hisobidan xarid qilingan bug‘doy bo‘yicha hisob-kitoblarni amalga oshirish uchun "O‘zbekiston respublika tovar-xomashyo birjasi" AJ har yili 1 iyunga qadar yanvar-aprel oylarida shakllangan o‘rtacha narxdan kelib chiqib, 3-sinf bug‘doy uchun o‘rtacha narxni o‘zining rasmiy saytida e’lon qilishi belgilandi.

Qishloq xo‘jaligini davlat tomonidan qo‘llab-quvvatlash jamg‘armasiga omborlardan don qabul qilish va berish jarayoni, shuningdek Jamg‘arma, tijorat vakillari va bug‘doy yetishtiruvchilar o‘rtasidagi moliyaviy hisob-kitoblarning tezkor va shaffof amalga oshirilishini ta’minlash uchun yaratilgan d-xarid.uz axborot tizimi orqali shartnoma asosida don xarid qilishga ruxsat berildi.

Hujjat bilan quyidagilar tasdiqlandi:

• 2025 yil hosilidan vaqtincha saqlash, davlat resursi va urug‘lik uchun bug‘doyni qabul qiladigan omborlar dislokatsiyasi;
• 2025 yil hosilidan davlat resursiga xarid qilinadigan bug‘doyning sinflar kesimidagi narxlarini aniqlash koeffitsiyentlari;
• 2026 yil hosili uchun tayyorlanadigan urug‘lik bug‘doyni vernalizatsiya qilish uchun sovitkichli omborxonalarda saqlash hajmlari.